بقلم:المهندس سرمد عقراوي سكنت الولايات المتحدة الامريكيه كطالب نفقه خاصه ومن ثم كمهندس مدني في مدينتين كبرى (عدد النفوس اكثر من 3 ملايين نسمه) ومدينه صغيره (عدد نفوسها نصف مليون نسمه) لمدة 32 سنه لم ينقطع التيار الكهربائي الا في احدى المدن الكبرى ولمدة يومين ؟! حيث ضربت عاصفة ثلجيه المدينه وادت الى سقوط اغلب كيبلات الكهرباء من على الاعمده ؟! تدرون ماذا فعلوا ؟! قاموا بجلب كل فرق الصيانه الكهربائيه ومن 50 ولايه بالطائرات وتم رفع ونصب كل الكيبلات التي سقطت على الارض رغم خطورتها في يومين فقط ؟! 48 ساعه...... سوف اعطيكم معلومات مهمه عن الكهرباء تعلمتها في حياتي... وللمعلومات حتى الجوزه (القاطع الكهربائي) من تنزل بالعراق فينقطع التيار ؟! انا لا ارفعها بيدي... لانني لا اثق بصناعتها.... فالغش هو سيد الموقف... بل استخدم عصا خشبيه لرفعها.... الطاقه (واطW) = التيار(امݒيرAmp) X الڤولتيه (الڤولتV) وكما ترون فإن التناسب عكسي ما بين التيار (امݒير) والڤولتيه (ڤولت) ؟! وهذا يعني كلما قلت الفولتيه (ڤولت) زاد التيار(امݒير) والعكس صحيح , الڤولتيه في العراق هي 220 (ڤولت) , ابو المولده يغشكم من يقلل الفولتيه (ڤولت) حتى يزيد التيار(امݒير). جاء جاري وهو متقاعد ولكن لديه ماجستير ودكتوراه من الولايات المتحده الامريكيه يمكن في الستينات فقال لي: هاي شنو سرمد انت تستعمل مكيف (سݒلت بالعراقي) بالشتاء للتدفئه ؟! فقلت له: نعم , اني استعمل (سݒلت (1 طن) اضعه على اوتوماتيك (AUTO) وبدرجه حراره الغرفه = 25 درجه) فقال هاي شنو هذا اشكد غالي ؟! فسالته وانت اشتستعمل فقال: هيتر كهربائي بالعراقي (كلمه انكليزيه - امريكيه تعني مدفأه = صوبه) فقلت له هذا اغلى ؟! قال: شلون ؟! كل شمعه بالهيتر الكهربائي= 800 – 1200 واط , خلي نقول معدل 1000 واط لكل شمعه , عندك هيتر بيه 2 شمعه هاي 2000 واط صح.... فقال: نعم.... زين هسه نجي للحساب, 2000 واط تقسيم 220 (ڤولت) = 9 (امݒير) بصوره مستمره (على طول), زين هسه نجي اني السبلت عندي (سبلت (1 طن) اضعه على اوتوماتيك (AUTO) وبدرجه حراره الغرفه = 25 درجه) اول ما يشتغل لمدة 2 ثانيه قد يصعد الى 16 (امݒير) ويستقر على 6 (امݒير) (أكرر يستقر على 6 (امݒير)) واني من احط السݒلت على الاوتوماتيك يشتغل وينطفي فلا يسحب6 (امݒير) بصوره مستمره (على طول).... وهم ارخص واحسن في التدفئه (اني اللي يهمني أحسن وليس أرخص) من الهيتر ابو الشمعتين اللي يسحب 9 (امݒير) بصوره مستمره (على طول) ؟!. استغرب واتعجب من ما قلت له...... تدرون ليش ؟! لأن الناس في هذه الدنيا تسوي الشيئ بدون سؤال ليش ؟! لأن أكثر الناس هي اللي دتسويها ؟! يعني يقلدون الاغلبيه (الاكثريه) تقليد أعمى بدون سؤال ؟! لو بحثت في القرآن عن (أكثر الناس): لوجدت بعدها هذه الكلمات: لا يعلمون , لا يشعرون , لا يؤمنون (لا يصدقون). ولو بحثت في القرآن عن كلمة (أكثرهم) لوجدت بعدها هذه الكلمات: يجهلون , لا يعقلون , لا يسمعون , معرضون. هنالك تجربه علميه يجب ان اذكرها لكم لانها والله مهمة جدا...... وضع العلماء 5 قرود في قفص ثم وضعوا في القفص درج وفي اعلى الدرج وضعوا موز , كلما حاول أحد القرده صعود الدرج للوصول الى الموز (العلماء , المشرفين على التجربه) يرشونه وبقية القرده بالماء الحار او يصعقونه ويصعقون باقي القرده بالتيار الكهربائي الى ان تعود القرده على عدم الصعود على الدرج لأكل الموز ؟! تم استبدال قرد واحد من الـ 5 قرده بقرد جديد, عند دخول القرد الجديد الى القفص حاول فورا الصعود على الدرج لأكل الموز ؟! تدرون اشصار ؟! هجمت عليه القرود الـ 4 القديمه وضربته لافهامه (حتي يفتهم) ممنوع الصعود على الدرج لأكل الموز ؟! افتهم.... وتم استبدال القرود الـ 5 كلها بهذه الطريقه..... واحد بعد واحد.... وفي النهايه.... اصبح هنالك 5 قرود جديده في القفص لا تصعد على الدرج لأكل الموز... الا انها.... (لم ترش بالماء الحار او تصعق بالكهرباء).... بمعنى آخر لا تعرف ما هو السبب ؟! أو لماذا... هي لا تصعد على الدرج لأكل الموز..... المهم ثم انتقلنا الى موضوع صوبة الكاز ؟! وانا لا استعملها لانني لوحدي , وهي تطلق غاز أول اوكسيد الكاربون CO وهو غاز قاتل ومميت ؟! من دراسة الدورة الدمويه من صف أول متوسط إذا تتذكرون؟! كريات الدم الحمراء تنقل الاوكسجين الى الخلايا ثم تعود بثاني اوكسيد الكاربونCO2 ليصفى في الرئة عن طريق الشهيق والزفير (التنفس) ؟! (شلون راح افهمها لجيل الحصار) غاز أول أوكسيد الكاربون اذا تنفسه الانسان فهو يذهب الى كريات الدم الحمراء ويدور في الجسم الى الخلايا ولكن لانه ليس اوكسجين فان الخلايا ستموت فيموت جسم الانسان كله ؟! (باختصار شديد يموت الانسان بالاختناق). زين اكو منبه للحريق (للدخان) قسم منه (أكررليس كل منبه حريق هو منبه لغاز أول أوكسيد الكاربون , مو تموتون واني ابتلش يوم القيامه) يعمل ايضا كمنبه لغاز أول اوكسيد الكاربون وهو جهاز كقرص دائري الشكل ويعمل على بطاريه ويثبت في سطح الغرفه الا انني لا اثق باي جهاز يباع في العراق ابدا لانعدام السيطره النوعيه ؟! في الولايات المتحده الامريكيه مكتوب عليه CO DETECTOR عوده الى الطاقه (واطW) = التيار(امݒيرAmp) X الڤولتيه (الڤولتV) في الولايات المتحده الامريكيه الڤولتيه (ڤولتV) هي 120 ڤولتVوليست 220 ڤولتVمما يزيد في نسبة التيار (امݒيرAmp) إذا سحبت من ابو المولده 10 (امݒيرAmp) وكان عندك محوله من 220 الى 120 وهيتر كهربائي يعمل بـ 120 ڤولتV فان ابو المولده دينطيك 10 (امݒيرAmp) ولكن لانه انت عندك محوله 220 الى 120 وهيتر كهربائي يعمل بـ 120 ڤولتV فان الـ 10 (امݒيرAmp) لـ 220 ڤولتV اللي دينطيك اياها ابو المولده ستكون 18.33 (امݒيرAmp) لـ 120 ڤولتV. شوفوا الامريكان شلون اذكياء..... داومت في ثانويه كلية بغداد من الصف الأول متوسط وحتى الصف الرابع اضطررت لتركها لسبب سياسي فاهلي كانوا من المغضوب عليهم وابناء الديكتاتور المقبور والمقبورين يداومون فيها ؟! المهم.... من تدخل الباب الرئيسي هنالك على الجهة اليسرى بجانب بناية السادس الاعدادي محوله..... هاي المحوله تخفض فولتيه العراق الـ 220 الى فولتيه الولايات المتحدة الامريكيه الـ 120...... حتى الامريكان (الفاذريه = جمع فاذر (بالعربي) وهم الآباء اليسوعيين الامريكان المؤسسين لثانوية كلية بغداد سنة 1932م , يسمون بالامريكي جسوتس JESUITS, لديهم كتاب جميل يشرح تاريخ ثانويه كلية بغداد بل وتاريخ تلك الحقبه من الزمن في العراق بعنوان: JESUITS BY THE TIGRIS) لا يحتارون في شراء الاجهزة الكهربائيه من الولايات المتحدة الامريكيه لانها تعمل بـ 120 ڤولت ؟! اسألكم سؤال ؟! كم طالب داوم في ثانويه كلية بغداد يعرف بهذه المعلومه ؟! سألت 10 ولا واحد بيهم انتبه لهذه النقطه واقصد المحوله ؟! زين اذا اشطر ناس (طلاب) في بغداد ما منتبهين على شغله بسيطه ؟! فما بال المساكين من جيل الحصار ؟! اللهم اشهد اني اقولها من باب العلم والمقارنه وليس مدحا بنفسي او انتقاصا من جيل الحصار يا رب. لو كانت الكهرباء تنقطع في احدى المدن الامريكيه ؟! كما تنقطع في العراق... لقامت شركة الكهرباء كابسط اجراء باصدار دليل(اسبوعي او نصف شهري او شهري) لاوقات ومناطق قطع الكهرباء (تره هذا ابسط شيئ يمكن ان تقوم به وزارة الكهرباء العراقيه) ليش ؟! لنفترض بان دليل اوقات ومناطق قطع الكهرباء (اسبوعي او نصف شهري او شهري) نشر في الاعلام بصوره عامه ومنه على صفحه الانترنيت لوزارة الكهرباء ولنفترض بانني ساكن في حي 14 رمضان (البعض يسميها الداؤودي) واعرف من الجدول بأن الكهرباء في منطقتي ستنقطع لمدة 6 ساعات يوم السبت من الساعه 6 صباحا والى 12 ظهرا ؟! واعرف من الجدول ايضا بان الكهرباء في الكرادة لن تكون مقطوعه في تلك الفترة ؟! اختي ساكنه في الكرادة ؟! اشيل غراضي وغراض جهالي واروح يم اختي بالكرادة ؟! وهم اختي من ينقع الكهرباء في الكرادة لانها تعرف من الجدول متلى ؟! وأين ؟! سوف تشيل غراضها وغراض جهالها وتجي يمي ؟! وهلم جره.... والله.... والله ماكو اكرم من العراقيين بالعالم...... بشهادة الاعداء وليس الاصدقاء ؟! يعني العراقيين يقومون يضيفون من منطقه الى منطقه اللي تنقطع بيها الكهرباء.... اعتقد واضحه جدا... السؤال هنا هو: هل سيسمع وزير الكهرباء (او بالاحرى) يقرأ اقتراحي هذا ؟! ويقوم باصدار دليل (اسبوعي او نصف شهري او شهري) لاوقات وعدد ساعات قطع الكهرباء في مناطق بغداد المختلفه ومنه باقي المحافظات ومناطقها المختلفه.... أنا لا أعتقد....... تدرون ليش ؟! لأن العرب (تعريف العرب = اغلب سكان الشرق الاوسط من عرب ومستعربين وكورد وفرس وترك وغيرهم) لا يقرءون وإذا قرءوا لا يفهمون (أو يعاندون أو يسوفون) واذا فهموا لا يطبقون واذا طبقوا لا يتقنون ؟!. ولا حول ولا قوة الا بالله العلي العظيم.......